عقیدہ تقدیر پر سکون زندگی کا سبب

اللہ تعالیٰ نے قرآن پاک میں عقیدہ تقدیر کی اہمیت، اس کا مطلب اور اس کے فوائد سورۃ الحدید میں بیان فرمائے ہیں۔ آیات بمع ترجمہ اور مختصر وضاحت درج ذیل ہے:

مَا أَصَابَ مِنْ مُصِيبَةٍ فِي الْأَرْضِ وَلَا فِي أَنفُسِكُمْ إِلَّا فِي كِتَابٍ مِّن قَبْلِ أَن نَّبْرَأَهَا ۚ إِنَّ ذَٰلِكَ عَلَى اللَّهِ يَسِيرٌ ﴿22﴾ لِكَيْلَا تَأْسَوْا عَلَىٰ مَا فَاتَكُمْ وَلَا تَفْرَحُوا بِمَا آتَاكُمْ ۗ وَاللَّهُ لَا يُحِبُّ كُلَّ مُخْتَالٍ فَخُورٍ ﴿23﴾

ترجمہ: کوئی مصیبت نہ زمین میں آتی ہے اور نہ تمہاری جانوں میں، مگر وہ ایک کتاب میں لکھی ہوئی ہے اس سے پہلے کہ ہم اسے پیدا کریں۔ بے شک یہ اللہ پر آسان ہے۔ تاکہ تم اس پر غم نہ کرو جو تم سے فوت ہو جائے اور اس پر زیادہ خوش نہ ہو جاؤ جو تمہیں عطا کیا گیا ہے۔ اور اللہ کسی اترانے والے فخر کرنے والے کو پسند نہیں کرتا۔

وضاحت: انسان پر دو ہی حالتیں آتی ہیں:

1۔ خوشی کی حالت: جس شخص کا عقیدہ تقدیر پر ایمان ہوگا، وہ خوشی میں تکبر نہیں کرے گا۔ کیونکہ اگر وہ تکبر میں مبتلا ہو جائے تو دوسروں کے حقوق ادا نہیں کرے گا اور انہیں نقصان پہنچائے گا۔

2۔ غم کی حالت: غم کے وقت بھی وہ شخص صبر کرے گا جس کو تقدیر پر ایمان ہوگا۔ ورنہ وہ یہ سوچتا رہے گا کہ اگر میں ایسا نہ کرتا تو ایسا نہ ہوتا۔

یہی وجہ ہے کہ آج کے زمانے میں ہم دیکھتے ہیں کہ بعض لوگ مایوسی کا شکار ہو کر خودکشی یا انتہائی سخت اور غلط اقدامات تک پہنچ جاتے ہیں، جبکہ عقیدہ تقدیر انسان کو صبر، سکون اور اعتدال سکھاتا ہے۔