انبیاء کرام علیہم السلام کی صفات و خصوصیات

سب سے مقرب بندے

تمام انبیاء کرام علیہم السلام اللہ تعالیٰ کے خاص اور مقرب بندے ہوتے ہیں۔ وہ تمام دوسرے انسانوں سے افضل ہوتے ہیں۔ اللہ تعالیٰ انہیں ایسی صفات عطا فرماتے ہیں جو عام انسانوں سے بڑھ کر ہوتی ہیں۔ قلبی، عقلی، روحانی اور جسمانی ہر اعتبار سے انبیاء کرام علیہم السلام کو عام انسانوں پر فوقیت حاصل ہوتی ہے۔

چنیدہ (منتخب)

تمام انبیاء کرام علیہم السلام اللہ تعالیٰ کی طرف سے منتخب کیے ہوئے ہوتے ہیں۔ کوئی انسان اپنی کوشش یا عبادت سے نبی نہیں بن سکتا۔ بلکہ یہ مرتبہ اللہ تعالیٰ اپنے منتخب بندوں کو عطا فرماتے ہیں۔

مرد ہونا

تمام انبیاء کرام علیہم السلام مرد تھے۔ اللہ تعالیٰ نے کسی عورت کو نبی نہیں بنایا۔

بشر ہونا

اللہ تعالیٰ نے انبیاء کرام علیہم السلام کو انسان بنایا۔ لیکن ان کی قوتوں اور صلاحیتوں میں عام انسانوں کے مقابلے میں بہت زیادہ فرق ہوتا ہے، جس کا مکمل اندازہ لگانا ممکن نہیں۔

پاکیزگی اور معصومیت

تمام انبیاء کرام علیہم السلام ہر قسم کے گناہوں سے پاک ہوتے ہیں، نبوت سے پہلے بھی اور بعد میں بھی۔ قرآن پاک میں بعض انبیاء جیسے حضرت آدم علیہ السلام اور حضرت یونس علیہ السلام کی طرف جس خطا کی نسبت کی گئی ہے، اس سے مراد اجتہادی خطا ہے، جو گناہ نہیں ہوتی۔

خیر خواہ

تمام انبیاء کرام علیہم السلام اپنی امت کے سب سے بڑے خیر خواہ ہوتے ہیں۔ وہ اللہ تعالیٰ کا پیغام پہنچاتے ہیں اور اس راستے میں تکالیف برداشت کرتے ہیں، مگر اس کے بدلے نہ مال طلب کرتے ہیں اور نہ کوئی دنیاوی فائدہ۔

امین

تمام انبیاء کرام علیہم السلام انتہائی امانت دار ہوتے ہیں۔ وہ اللہ تعالیٰ کا پیغام بغیر کسی کمی بیشی کے اپنی امت تک پہنچاتے ہیں۔