تذکرہ
مستند،بنیادی اور عام فہم اسلامی تعلیمات
⬅ مین پیج پر واپس جائیں
عقائد
سبق نمبر 2
بنیادی عقائد

اس سبق میں ہم درج ذیل باتیں سیکھیں گے۔

1۔ اللہ تعالی کی رضا مندی اسلام کے علاوہ کسی اور دین سے حاصل نہیں کی جاسکتی
2۔ اسلام زندگی گذارنے کا بہترین اور مکمل طریقہ ہے۔
3۔ اسلام قیامت تک محفوظ رہے گا
4۔ علماء حقہ قیامت تک موجود رہیں گے
5۔چند ایسے کلمات جو ایمان کی بنیاد ہیں ۔اور یہ کلمات ہر مسلمان کو یاد کرنے چاہئے۔
اسلام ہی نجات کا واحد راستہ

اللہ تعالیٰ کی رضامندی اسلام کے علاوہ کسی اور دین سے حاصل نہیں کی جا سکتی۔

زندگی گزارنے کا جو طریقہ اللہ تعالیٰ نے انبیاء علیہم السلام کے ذریعے انسانوں کو بتایا، اسی کو دین کہتے ہیں۔

ہمارے پیارے حضرت محمد صلی اللہ علیہ وسلم آخری نبی ہیں، اب قیامت تک کوئی اور نبی نہیں آئے گا، اور جو دین اللہ تعالیٰ نے آپ صلی اللہ علیہ وسلم کو عطا فرمایا وہ بھی آخری دین ہے۔

لہٰذا اب اللہ تعالیٰ کی رضامندی صرف دینِ اسلام کے مطابق زندگی گزارنے سے حاصل ہوگی۔ اگر اسلام کے خلاف کوئی کام کیا جائے تو اس سے اللہ تعالیٰ راضی نہیں ہوں گے۔
اسلام زندگی گزارنے کا بہترین اور مکمل طریقہ

اسلام زندگی گزارنے کا بہترین اور مکمل طریقہ ہے۔

زندگی گزارنے کے لیے طریقہ اور قانون کا تعین کرنے کے دو طریقے ہیں:

1۔ پیدا کرنے والے سے طریقہ پوچھا جائے کہ میں زندگی کس طرح گزاروں۔ جو طریقہ اللہ تعالیٰ بتائیں گے وہ زیادہ بہتر ہوگا، کیونکہ اللہ تعالیٰ نے ہمیں پیدا کیا ہے اور وہ ہماری ضروریات، خواہشات اور جذبات کو ہم سے زیادہ جانتے ہیں۔ یہی طریقہ اسلام ہے جو ہمیں حضرت محمد صلی اللہ علیہ وسلم کے ذریعے ملا۔

2۔ خود یا چند انسان مل کر کوئی قانون بنائیں کہ اس طرح زندگی گزارنی ہے۔ یہ طریقہ انسان کی زندگی کے لیے مکمل اور بہتر نہیں ہو سکتا، کیونکہ انسان کا علم، عقل اور فہم محدود ہے اور وہ تمام انسانوں کے جذبات و احساسات کا احاطہ نہیں کر سکتا۔

لہٰذا ایک مسلمان کے ایمان کا حصہ ہے کہ وہ یہ یقین رکھے کہ زندگی گزارنے کا سب سے بہترین طریقہ اسلامی احکام پر عمل کرنا ہے۔

ایک اہم بات: اگر ہم اسلامی احکام پر مکمل عمل نہ بھی کر سکیں تب بھی ہمارا عقیدہ یہی ہونا چاہیے کہ بہترین طریقہ زندگی اسلام ہی ہے۔

اسلام ایک مکمل دین ہے جس میں انسانی زندگی کے ہر شعبے سے متعلق اصولی احکام موجود ہیں، اور اس پر ایمان رکھنا بھی ہمارے ایمان کا حصہ ہے۔
اسلام قیامت تک محفوظ رہے گا

دین اسلام کے احکام قیامت تک محفوظ رہیں گے۔ اس کی دلیل سمجھنے کیلئے درج ذیل 2 بنیادی باتیں سمجھئے۔

1۔ ہمارے پیارے نبی حضرت محمد صلی اللہ علیہ وسلم آخری نبی ہیں۔ اب قیامت تک کوئی نبی نہیں آئے گا اور نہ ہی کوئی نیا دین آئے گا، کیونکہ نیا دین نبی کے بغیر نہیں آسکتا۔

2۔ اللہ تعالیٰ کی سنت یہ ہے کہ ہر زمانہ کے لوگوں کی ہدایت کا انتظام موجود ہوتا ہے، تاکہ قیامت میں کوئی انسان یہ نہ کہہ سکے کہ جس زمانہ میں وہ موجود تھا اس وقت کوئی ایسا طریقہ موجود ہی نہیں تھا جس پر عمل کیا جاتا۔

جب ہم اوپر ذکر کی گئی دونوں باتوں کو ملاتے ہیں تو اس سے یہ نتیجہ نکلتا ہے کہ قیامت تک دین اسلام محفوظ رہے گا۔
تاکہ قیامت تک آنے والے انسانوں کی ہدایت کا انتظام موجود رہے۔
علماء حقہ بھی ہمیشہ موجود رہیں گے

موجودہ زمانہ میں ایک غلط فہمی مسلمانوں میں عام ہے کہ اب صحیح علماء موجود نہیں ہیں، ہم دین کس سے سیکھیں۔

جیسا کہ یہ بات ہم جان چکے ہیں کہ انسانیت کی ہدایت کا انتظام اللہ تعالیٰ ہر زمانہ میں رکھتے ہیں۔

لہٰذا علماءِ حقہ اور صالح علماء جو قرآن و سنت پر عمل بھی کرتے ہیں، دین کی تعلیمات کی ہر قسم کی تحریفات سے حفاظت بھی کرتے ہیں اور عوام کی تعلیم و تربیت کی کوشش بھی کرتے ہیں، ہر زمانہ میں موجود رہتے ہیں۔

لہٰذا یہ سمجھنا یا کہنا بالکل غلط ہے کہ اب صحیح علماء موجود نہیں ہیں۔
اگر سچے دل سے دعا کرکے اپنے ارد گرد تلاش کیا جائے تو ایسے بہت سے علماء موجود ہیں۔
چند کلمات جن کو یاد کرنا ضروری ہے

چند ایسے کلمات ہیں جن کو عربی میں یاد کرنا اور ان کا مطلب سمجھنا ایک مسلمان کیلئے ضروری ہے۔

ذیل میں چند اہم کلمات بمع ترجمہ دیے جا رہے ہیں:
کلمہ طیبہ:
لَا إِلٰهَ إِلَّا اللّٰهُ مُحَمَّدٌ رَسُولُ اللّٰهِ
اللہ کے سوا کوئی معبود نہیں، محمد ﷺ اللہ کے رسول ہیں۔
کلمہ شہادت:
أَشْهَدُ أَنْ لَّا إِلٰهَ إِلَّا اللّٰهُ وَأَشْهَدُ أَنَّ مُحَمَّدًا عَبْدُهُ وَرَسُولُهُ
میں گواہی دیتا ہوں کہ اللہ کے سوا کوئی معبود نہیں اور میں گواہی دیتا ہوں کہ محمد ﷺ اللہ کے بندے اور رسول ہیں۔
کلمہ تمجید:
سُبْحَانَ اللّٰهِ وَالْحَمْدُ لِلّٰهِ وَلَا إِلٰهَ إِلَّا اللّٰهُ وَاللّٰهُ أَكْبَرُ وَلَا حَوْلَ وَلَا قُوَّةَ إِلَّا بِاللّٰهِ الْعَلِيِّ الْعَظِيمِ
اللہ ہر عیب سے پاک ہے، تمام تعریفیں اللہ کیلئے ہیں، اللہ کے سوا کوئی معبود نہیں، اللہ سب سے بڑا ہے، اور گناہوں سے بچنے کی طاقت اور نیکی کرنے کی قوت صرف اللہ بلند و عظیم کی طرف سے ہے۔
کلمہ توحید:
لَا إِلٰهَ إِلَّا اللّٰهُ وَحْدَهُ لَا شَرِيكَ لَهُ، لَهُ الْمُلْكُ وَلَهُ الْحَمْدُ يُحْيِي وَيُمِيتُ وَهُوَ حَيٌّ لَا يَمُوتُ أَبَدًا أَبَدًا، ذُو الْجَلَالِ وَالْإِكْرَامِ، بِيَدِهِ الْخَيْرُ وَهُوَ عَلَىٰ كُلِّ شَيْءٍ قَدِيرٌ
اللہ کے سوا کوئی معبود نہیں، وہ اکیلا ہے، اس کا کوئی شریک نہیں، اسی کی بادشاہی ہے اور اسی کیلئے تمام تعریفیں ہیں، وہی زندہ کرتا ہے اور وہی موت دیتا ہے، وہ ہمیشہ زندہ رہنے والا ہے کبھی نہیں مرے گا، وہ عظمت اور بزرگی والا ہے، اسی کے ہاتھ میں بھلائی ہے اور وہ ہر چیز پر قادر ہے۔
سید الاستغفار:
اَللّٰهُمَّ أَنْتَ رَبِّي لَا إِلٰهَ إِلَّا أَنْتَ، خَلَقْتَنِي وَأَنَا عَبْدُكَ، وَأَنَا عَلَىٰ عَهْدِكَ وَوَعْدِكَ مَا اسْتَطَعْتُ، أَعُوذُ بِكَ مِنْ شَرِّ مَا صَنَعْتُ، أَبُوءُ لَكَ بِنِعْمَتِكَ عَلَيَّ، وَأَبُوءُ بِذَنْبِي فَاغْفِرْ لِي، فَإِنَّهُ لَا يَغْفِرُ الذُّنُوبَ إِلَّا أَنْتَ
اے اللہ! تو میرا رب ہے، تیرے سوا کوئی معبود نہیں، تو نے مجھے پیدا کیا اور میں تیرا بندہ ہوں، اور میں اپنی طاقت کے مطابق تیرے عہد اور وعدے پر قائم ہوں، میں اپنے کیے ہوئے برے کاموں کے شر سے تیری پناہ مانگتا ہوں، میں اپنے اوپر تیری نعمتوں کا اقرار کرتا ہوں اور اپنے گناہوں کا بھی اقرار کرتا ہوں، پس مجھے معاف فرما دے کیونکہ تیرے سوا کوئی گناہ معاف کرنے والا نہیں۔
ایمان مفصل:
آمَنْتُ بِاللّٰهِ وَمَلَائِكَتِهِ وَكُتُبِهِ وَرُسُلِهِ وَالْيَوْمِ الْآخِرِ وَالْقَدَرِ خَيْرِهِ وَشَرِّهِ مِنَ اللّٰهِ تَعَالَى وَالْبَعْثِ بَعْدَ الْمَوْتِ
میں ایمان لایا اللہ پر، اس کے فرشتوں پر، اس کی کتابوں پر، اس کے رسولوں پر، قیامت کے دن پر، اور اس بات پر کہ اچھی اور بری تقدیر اللہ تعالیٰ کی طرف سے ہے، اور مرنے کے بعد دوبارہ زندہ کیے جانے پر۔
⬅ پچھلا سبق اگلا سبق ➡
🚀 Learn Basic Islamic Aqaid Course

Iman-e-Mufassal explains the basic aqaid of Islam in detail. It is very essential for every Muslim to understand these beliefs properly.

👉 If you are willing to learn Basic Islamic Aqaid Course, we are offering easy lessons in Urdu based on Quran and Sunnah.
👉 Just spend 10 minutes daily and improve your Islamic knowledge step by step.