sahaba -

صحابہ کرام رضی اللہ عنہم

صحابی کا مطلب اور صحابی کسے کہتے ہیں

صحابہ کرام کی اہمیت اور مقام

تمام صحابہ کرام محفوظ ہیں

عشرہ مبشرہ اور خلفائے راشدین کا تعارف

صحابہ کرام رضی اللہ عنہم اور تاریخ

خلیفہ اول حضرت ابو بکر صدیق رضی اللہ عنہ

صحابی کی تعریف

صحابی کا لفظی معنی ہے "ساتھی"، لیکن شریعت کی اصطلاح میں صحابی سے مراد ہر وہ شخص ہے جس نے ایمان کی حالت میں جاگتے ہوئے آپ صلی اللہ علیہ وسلم کی زیارت کی ہو اور ایمان ہی کی حالت میں اس کی وفات ہوئی ہو۔

"جاگتے ہوئے" کی قید اس لیے لگائی گئی ہے کہ اگر کسی نے نیند کی حالت میں آپ صلی اللہ علیہ وسلم کی زیارت کی ہو تو وہ صحابی نہیں کہلائے گا۔

صحابۂ کرام رضی اللہ عنہم کا مقام

اللہ تعالیٰ نے نبی کریم صلی اللہ علیہ وسلم کو آخری نبی بنا کر مبعوث فرمایا ہے، اور اب قیامت تک کوئی نبی نہیں آئے گا۔ اس لیے آپ صلی اللہ علیہ وسلم کی تعلیمات کی حفاظت نہایت اہم ہے، کیونکہ اگر دین محفوظ نہ رہے تو دنیا میں اللہ تعالیٰ کی رضا حاصل کرنے کا کوئی راستہ باقی نہیں رہتا۔

چنانچہ اللہ تعالیٰ نے دینِ اسلام کی حفاظت کا سب سے پہلا ذریعہ صحابۂ کرام رضی اللہ عنہم کو بنایا۔ انہوں نے براہِ راست نبی کریم صلی اللہ علیہ وسلم سے دین سیکھا، اس پر مکمل عمل کیا، اور پھر اسے پوری دنیا میں عام کیا۔

اسی وجہ سے قرآن و حدیث کے علوم کی حفاظت، دین کی صحیح تشریح اور اس کی اشاعت کا سارا سہرا صحابۂ کرام رضی اللہ عنہم کے سر ہے، اور انہی کی بدولت دینِ اسلام آج اپنی اصل شکل میں محفوظ ہے۔

حتیٰ کہ اللہ تعالیٰ نے قرآنِ پاک میں صحابۂ کرام کے ایمان کو معیار بنایا:

وَإِذَا قِيلَ لَهُمْ آمِنُوا كَمَا آمَنَ النَّاسُ قَالُوا أَنُؤْمِنُ كَمَا آمَنَ السُّفَهَاءُ ۗ أَلَا إِنَّهُمْ هُمُ السُّفَهَاءُ وَلَٰكِن لَّا يَعْلَمُونَ

"اور جب ان سے کہا جاتا ہے کہ ایمان لاؤ جیسے لوگ ایمان لائے ہیں، تو کہتے ہیں: کیا ہم بھی ایسے ایمان لائیں جیسے بے وقوف ایمان لائے ہیں؟ خبردار! بے شک وہی خود بے وقوف ہیں، لیکن وہ جانتے نہیں۔"

        اس آیت میں اللہ تعالیٰ نے صحابۂ کرام کے ایمان کو نمونہ اور معیار قرار دیا ہے۔ یعنی کامل ایمان وہی ہے جو صحابۂ کرام رضی اللہ عنہم کا تھا۔
    

لہٰذا اسلام میں صحابۂ کرام رضی اللہ عنہم کا مقام نہایت بلند اور اہم ہے۔ ان کے بغیر دین کو سمجھنے کا کوئی دعویٰ درست نہیں ہو سکتا، اور جو شخص صحابۂ کرام کی بے توقیری کرتا ہے، وہ بھی دین کو صحیح طور پر نہیں سمجھ سکتا۔

تمام صحابہ محفوظ ہیں

تمام صحابہ کرام رضی اللہ عنہم محفوظ ہیں، معصوم نہیں۔ معصوم کا مطلب ہے جس سے کوئی غلطی نہ ہو، اور یہ صفت صرف انبیاء کرام علیہم السلام کی ہے۔

صحابہ کرام رضی اللہ عنہم سے غلطی ہو سکتی ہے، لیکن اللہ تعالیٰ نے انہیں محفوظ بنایا ہے۔ یعنی اگر کسی صحابی سے کوئی گناہ ہو بھی جائے تو اللہ تعالیٰ ان کو اس کے اخروی نقصان سے محفوظ فرما دیتا ہے اور دنیا ہی میں ان کی نیکیوں کی بدولت اس گناہ کو معاف فرما دیتا ہے۔

اس کی واضح دلیل قرآن پاک کی درج ذیل آیت ہے:

أُولَٰئِكَ كَتَبَ فِي قُلُوبِهِمُ الْإِيمَانَ وَأَيَّدَهُم بِرُوحٍ مِّنْهُ وَيُدْخِلُهُمْ جَنَّاتٍ تَجْرِي مِن تَحْتِهَا الْأَنْهَارُ خَالِدِينَ فِيهَا ۚ رَضِيَ اللَّهُ عَنْهُمْ وَرَضُوا عَنْهُ ۚ أُولَٰئِكَ حِزْبُ اللَّهِ ۚ أَلَا إِنَّ حِزْبَ اللَّهِ هُمُ الْمُفْلِحُونَ

ترجمہ: "یہ وہ لوگ ہیں جن کے دلوں میں اللہ نے ایمان لکھ دیا ہے..." (سورۃ المجادلہ: 22)

مختصر وضاحت: اس آیت سے معلوم ہوتا ہے کہ اللہ تعالیٰ نے صحابہ کے دلوں میں ایمان کو مضبوط کیا اور انہیں اپنی خاص مدد سے نوازا، اور اپنی رضا کا اعلان فرمایا۔

کیا تمام صحابہ درجہ کا درجہ برابر ہے؟

صحابی ہونے کے اعتبار سے تو تمام صحابہ برابر ہیں۔یعنی عمومی فضائل میں تو تمام صحابہ شریک ہیں لیکن بعض خاص اعمال اور صفات کی وجہ سے اللہ تعالی نے بعض صحابہ کو فضیلت عطا فرمائی ہے۔ذیل میں ان اعمال و صفات کا تذکرہ کرتے ہیں۔

1۔ سبقت فی الاسلام

جو صحابہ کرام رضی اللہ عنہم بالکل ابتدا میں اسلام لائے ان کو بعد میں اسلام لانے والوں پر فضیلت حاصل ہے۔

2۔ ہجرت مدینہ

جن صحابہ کرام نے مدینہ منورہ کی طرف ہجرت فرمائی ان کو بھی خاص فضیلت حاصل ہے۔

3۔ غزوہ بدر

جن صحابہ نے غزوہ بدر میں شرکت فرمائی ان کو بھی خاص فضیلت حاصل ہے۔

4۔ انصار

جن صحابہ نے مدینہ ہجرت کرنے والے صحابہ کی نصرت کی ان کو بھی اللہ تعالی نے خاص فضیلت عطا فرمائی۔

5۔ بیعت رضوان

جو صحابہ نے صلح حدیبیہ کے موقع پر بیعت میں شریک تھے انکی بھی قران پاک میں اللہ تعالی نے خاص تعریف بیان کی ہے۔

6۔ فتح مکہ سے پہلے ایمان

جو صحابہ فتح مکہ سے پہلے ایمان لائے قران پاک میں اللہ تعالی نے ان کی افضیلت کا بتایا۔

7۔ خلافت راشدہ

حضور صلی اللہ علیہ وسلم نے خلفائے راشدین کی فضیلت بیان کی۔

8۔ عشرہ مبشرہ

10 صحابہ کرما کو ایک ہی مجلس میں جنت کی خوشخبری دی گئی۔ان صحابہ کی خاص فضیلت ہے۔

چند ممتاز صحابہ کرام رضی اللہ عنہم

حضرت ابوبکر صدیق رضی اللہ عنہ

اولین صحابہ میں سے ہیں، ہجرت مدینہ فرمائی، خلیفہ اول ہیں اور عشرہ مبشرہ میں شامل ہیں۔ نبی کریم ﷺ کے سفر ہجرت کے ساتھی بھی تھے۔

حضرت عمر رضی اللہ عنہ

سابقین اولین میں سے ہیں، غزوہ بدر اور صلح حدیبیہ میں شریک ہوئے، اور عشرہ مبشرہ میں شامل ہیں۔ آپ عدل و انصاف کا عظیم نمونہ ہیں۔

حضرت عثمان رضی اللہ عنہ

دو ہجرتیں کیں، خلیفہ ثالث ہیں اور عشرہ مبشرہ میں شامل ہیں۔ قرآن مجید کی تدوین کا عظیم کارنامہ انجام دیا۔

حضرت علی رضی اللہ عنہ

سابقین اولین میں سے ہیں، نبی ﷺ کے قریبی رشتہ دار اور داماد ہیں، ہر اہم معرکے میں شریک رہے اور خلیفہ چہارم ہیں۔

حضرت طلحہ رضی اللہ عنہ

عشرہ مبشرہ میں شامل ہیں، غزوہ احد میں نبی ﷺ کی حفاظت کرتے ہوئے بڑی قربانی دی اور شدید زخمی ہوئے۔

حضرت زبیر بن عوام رضی اللہ عنہ

عشرہ مبشرہ میں شامل ہیں اور اسلام کے ابتدائی دور میں ایمان لائے۔ آپ کو "حواری رسول" بھی کہا جاتا ہے۔

حضرت عبدالرحمن بن عوف رضی اللہ عنہ

عشرہ مبشرہ میں شامل ہیں، ہجرت فرمائی اور اپنی سخاوت اور تجارت کے ذریعے اسلام کی بہت خدمت کی۔

حضرت سعد بن ابی وقاص رضی اللہ عنہ

عشرہ مبشرہ میں شامل ہیں۔ اسلام کے ابتدائی دور میں ایمان لائے اور اسلام کے عظیم مجاہدین میں شمار ہوتے ہیں۔

حضرت سعید بن زید رضی اللہ عنہ

عشرہ مبشرہ میں شامل ہیں۔ سابقین اولین میں سے ہیں اور اسلام کی دعوت و اشاعت میں اہم کردار ادا کیا۔

حضرت ابو عبیدہ بن الجراح رضی اللہ عنہ

عشرہ مبشرہ میں شامل ہیں۔ نبی کریم ﷺ نے آپ کو "امین الامۃ" یعنی امت کا امانت دار فرمایا۔

صحابہ کرام رضی اللہ عنہم کے فضائل قرآن و حدیث میں

یہ بات ہر مسلمان کو سمجھنی چاہئے کہ صحابہ کرام رضی اللہ عنہم کے فضائل قرآن و حدیث میں بیان کیے گئے ہیں۔ اسی طرح صحابہ کرام کی صفات بھی قرآن پاک اور احادیث میں بیان کی گئی ہیں۔

قرآن پاک میں حضرت ابوبکر صدیق رضی اللہ عنہ کا ہجرت کے موقع پر نبی کریم ﷺ کے ساتھ سفر کا ذکر کیا گیا ہے۔

حضرت عائشہ صدیقہ رضی اللہ عنہا کی پاکیزگی اور براءت قرآن مجید میں بیان کی گئی ہے۔

قرآن میں یہ بھی بتایا گیا ہے کہ صحابہ کرام آپس میں رحماء بینہم ہیں، یعنی وہ ایک دوسرے کے دشمن نہیں ہو سکتے۔

لہٰذا اگر کوئی شخص تاریخی روایات جن کا سچا ہونا مشکوک ہے، ان کی بنیاد پر صحابہ کرام کے بارے میں غلط عقیدہ رکھے تو وہ قرآن و حدیث کے خلاف ایک گمراہ کن نظریہ ہوگا۔

لہٰذا اس طرح کے نظریات اور عقائد سے بچنا ضروری ہے تاکہ ایمان کی حفاظت کی جا سکے۔

⬅ پچھلا سبق اگلا سبق ➡